بعد منتصف الليل

عند تلك العتمة السوداء بعد منتصف الليل خواطر كثيرة تجول في عالم التفكير... فبعد الثالثة فجراً ندخل في مجرة مختلفة تماماً عن الحياة التي نحياها في الصباح...مجرة يملؤها الأمل...الأمل لما نحيا من أجله... الأمل لما مبقينا على قيد الحياة... الحياة التي تصعب لحظة بعد لحظة..في ذلك الليل...نسافر مع النجوم إلى فضاء الحلم...فترينا النجمة عندما تنطفئ انها إذا ما انطفأت لن تتوهج بقوة أكبر... تلك النجمة البعيدة صغيرة في عيوننا كبيرة بفعلها كثيرة في سمائنا... عندما تتجمع في ساحة السماء تبدأ بمناداتنا لننظر إلى الأعلى من جوف حزننا حتى نعلم أن الذي خلق الكواكب والمجرة والإنسان قادر على انتزاع الحزن من قلوبنا وأعيننا وذواتنا...وقادر حتى على جعلنا نؤمن بالسماء الكبيرة التي نحيا عندما نلقي نظرة على ما يختبئ داخلها...معاني وحروف وأشخاص وسمات ولمعات تتوهج مع كل نسمة حياة على هذه الحياة...محاربة الحياة من أجل الأمل ... تلك المحاربة قوة كبيرة ليست كل النجوم على الأرض تتمتع بها.. هنالك نجوم من نوع البشر تبحث عن نقطة الأمل في قلوب أصدقائها البشر... فالحياة الآن أصبحت متعلقة بكائناتها فإما أن تعيش بها وإما أن تموت كائناتها من أجل حياتها...الغريب أن الحياة تبحث عن حياة وكذلك البشر... بدون شعور ملموس يبحثون عن سبب للحياة داخل الموت.. يقتربون من الموت حتى يقتربوا من الحياة أكثر... جميعنا سنحيا..فلنحيا بسلام وأمل وإيمان وحب فلنحيا مجرة الأمل في الصباح والمساء والفجر والنور❤
ماريا كلارا منصور

تابع القراءة »

جمال الخيال و تجميل الواقع

في بعض الأحيان نترك قلوبنا تختبئ وراء الخيال..نحن ندرك الحقيقة ولكن نحجب مخيلتنا عنها ونجعل الأحلام تقف مشعة للون الأسود أمام بصيرتنا..دائما نحلق في سماء الخيال وننسى وجودنا في أرض الواقع...الخيال شارع طويل لو قررنا السير فيه لن نخرج منه إلا بعد أن تترك كل نثرة على مفارق الطرق المنتشرة هناك ثغرة في قلوبنا تجعلنا نلون الحياة بدفعة أمل لنحياها بأمل جديد في كل مرة نجول في شوارع الخيال...الكثير من الكلام نجمعه من شوارع وأزقة خيالنا لا نستطيع ترتيبه بحروف وكلمات وجمل يفهمها من حولنا..ذلك الكلام المخبأ داخلنا يقول: إنني حر إنني أحيا إنني أعيش ﻷجعل الحياة أقوى ولأجعلها تنسى الظلم وتضع المجرمين في السجون والمظلومين أحراراً في خيال الحياة لنبدأ من جديد قصة الحب الجديدة.. قصة اقتحامنا الخيال وتجاهل الواقع ورميه بعيداً لبضعة دقائق لنتجول بها في عالم بعيد عن كل ما يؤذي أرواحنا..أرواحنا الصغيرة المذعورة من حروب الحياة الظالمة...تلك الأرواح التي تعيش بذعر كبير خوفاً من مصيرها في الحياة...لنقف قليلاً ونبعث تفكيرنا في رحلة..رحلة بعيدة.. ليعود حاملاً معه أجمل الذكريات..وليس فقط ذكريات بل أن تكون تلك الذكريات معطرة برائحة الروح القوية...الروح التي ستكون يوماً بعد يوم وليلة بعد ليلة ببحر من الفرح لا تستطيع النهوض إلا للقاء فرح جديد...
حياتنا تستحق التفكير بالخيال لنجعل للواقع قيمة أكبر فالواقع ضعيف وقوته تكمن بوجود خيال يغذيه بقوة وفرح وحلم نتمنى حدوثه حتى يصبح الحلم الذي يجاور النجمة واقعاً يرافق جميع أرواح البشر ويصبح الواقع أكثر جمالاً من الخيال..❤
ماريا كلارا منصور

تابع القراءة »

تشتت الحياة على الكوكب

الحياة على كوكبنا باتت مليئة بالحكايات ففي كل قلب عدد لا متناهي من الكلمات والحروف التي لا يعرف حامل القلب البوح بها...
منها الذكريات ومنها الأشواق ومنها الحب...
فإذا أتى إلى بال الإنسان ذكرى جميلة وسط يأس عميق ستعلمه معنى الصبر.. فلا حزن يدوم ولا قلب يبقى منسيا..ً إن الله يعلم ما في قلوبنا الصغيرة ويعلم أنها ملتحفة بقشور من الحزن والسواد..وسيأتي يوم يختاره الله بحكمته ويغمر♡ كل قلب عاش لحظة الحياة وهو على قيد الموت ♡بفرح لا متناهي ويجعل لحظة الحياة حياة كاملة يحياها القلب ببهجة فينتزع هذا السواد عن قلوبنا البيضاء النقية وتبقى بعيدة عن معاناة الحياة والموت..
فإذا كان القلب بحجم يدنا الصغيرة التي لا تقوى دائماً على حمل الأشياء فكيف سيكون القلب عند حمله لكل نثرة حزن ووجع يلقاها في دربه الطويلة؟ 
القلب اليئس دائماً يصرخ وفي كل الأحيان يبكي لأنه بحاجة إلى قلب آخر يعينه في تصديه لأوجاعه..فلا تكبتوا أصوات قلوبكم بل اجعلوها تطير مع الهواء المحلق إلى مكان مجهول واجعلوها تطير إلى ما لا تعرفون حتى تكون قلوبكم ونفوسكم مسرورة ولألا تضيع لحظات حياتكم الثمينة هباءً...
كل لحظة تسرق شيئاً من فرحة القلب فإذا لم نتمسك بفرحتنا ومصدر قوتنا في جميع حالاتنا لا نستطيع إكمال حياتنا بحياة..❤
ماريا كلارا منصور

تابع القراءة »

حبكة الحرب

يا ترى ليش خلقنا؟
ببال كل واحد فينا بيخطر هاد السؤال واكتر شي بهي الايام لي عم نمرق فيا..
معقول خلقنا لنتعذب؟..ولا خلقنا وبعدين اجانا العذاب؟
تساؤلات كتير وكلون ما في الهن ولا جواب...كل ما نسمع صوت صرنا نخاف ونرتعب حتى لو كان هاد الصوت كلمة مفاجأة بس عصوت عالي..قرب عيد الحب وبهالمناسبة الحلوة حبوا يعملولنا عيد بطريقة مختلفة عيد اسمو عيد الدم بدال ما يكون اللون الأحمر لون الوردة لي بيهديا الشب لحبيبتو ولون الدبدوب لي رح تهدي الصبية لحبيبا...صار لون الخراب والدمار ...صرنا ازا نشوفو نخاف اكتر من صوت القذيفة يلي صار عم يرن بأدانينا صار جوات قلبنا في خوف هاد الخوف قتلنا...مو بس قتلنا حطنا بتابوت ومشي بجنازتنا بس الفرق بين الجنازات العادية والجنازة هي انو الشيطان دفنا نحنا وعايشين وما حدا مشي بجنازتنا غيرو ...في حروف عم تطلع من القلب هي الصوات قتلتا....في كتير شغلات خربتا الحرب.. وصلحا الحب وهلق ضربوا عالوتر الحساس وعيد الحب صار عيد السما بحب ولادا لي عم يطلعوا لعندا واحد ورا التاني...كلنا افترقنا...هاد لي فرقتو الحرب عن حبيبتو لي سافرت ويمكن تكون ما سافرت عالأرض يمكن سافرت عالسما..في أشخاص فرقون كلمة صغيرة ونسيوا قيمة الشخص الموجود معون...وفي أشخاص خربون الانتظار والشوق...في ناس صارت عم تبكي وتكتشف بعد ما تبكي انو دموعا صار الهن لون تاني هو اللون الأحمر..أي اللون لي عن جديد صرنا كلنا نكرهو بعد ما كان اللون الأحمر هو لون المحبة صرنا نعبر عن محبتنا بأي لون تاني...تعبنا من وضعنا...طلاب المدارس شو وضعا يا ترى؟؟ اعدة متخبية تحت المقاعد عم تستنى الوضع يهدا بس لترجع لحضن أهلا ..يا ترى هاد الشي عذاب ولا قوة الصمود؟؟ ما حدا بيعرف... رح احكي عني عن صفي عن رفقاتي عن طلاب التاسع لي اكتر شباب وصبايا تعبوا هالسنة...مو شرط تكون الدراسة بس لي تعبتون...في شي تاني اسمو وجع..وجع جوات قلب كل واحد فينا عم يستنى الحرب تخلص ومتمني تخلص اليوم قبل بوكرا...الكتب تبعنا لي لهلق ماعم نعرف أي صفحة نفتح فيون هدول مو لازم نكون منعرف شو في بقلبون...معقول الحرب تكون بدا تكسرنا وتخلينا ضعاف ولا لا...يمكن الحرب هي لي عم نخبي كلشي تحتا...تحت الحرب في خوف ووجع وظلم وتعب وحلم عم يموت وروح عم تجرب تروح عالسما وماعم تقدر عم تتمسك بأمل جديد...كتير في شغلات دفنتا الحرب تحت التراب...يارب ساعدنا..بهالدنية كلا ما النا غير محبتك...
وجعنا كبير وعم نصرخ صرخة وجع لبواب السما يارب فتاح بواب السما وسمعنا وخلينا نكون أقوى من الحرب لي عم تدمرنا شوي شوي....
ماريا كلارا منصور

تابع القراءة »

....

وهلق شو خلص؟؟! لي مات مات ولي عاش ولي نفد عاش ولي انصاب انصاب وهيك يعني بكل هالبساطة منمشي ومنكمل حياتنا وفي مئات وملايين العالم عم تموت نحنا مانا حاسين على شي بس لما الشي بيوصل لقلب مدرستك لقلب بيتك التاني لصبية كل يوم بتطلع من بيتا الصبح بهالحرب لتروح عالمدرسة وتثبت للإرهاب انو نحنا عايشين ونحنا عم نعمر بلدنا اكتر من كل مرة بتهدموا فيا... لما بتوصل الحرب لقلب قلبك بس رح تعرف شو يعني حرب...لما رح تدوق الوجع لي داقو كتير مننا بس رح تعرف شو يعني حرب...بس نحنا شو عم نستنى؟؟؟ عم نستنى لتوصل الحرب لعنا كلنا بعدين منتحرك؟؟بعدين منعرف نوقفا؟؟ صدقوني شي بشع..إذا منقدر نوقفو قبل ما يوصل لعنا منكون عايشين بالجنة ومو حاسين...كل يوم ممكن يموت ولد صغير متل الياس أو صبية صغيرة متل ريتا..ريتا يا ريتا يا احلى ملاك بالسما..نورتي بيتك الجديد..السما كلا مبسوطة فيكي خسرناكي عالأرض وربحتك السما..بكيتينا يا ريتا..ما بتستاهلي تموتي كان لسا ادامك حياة طويلة بس الله نادالك مشان ما تتعذبي بالحياة وتشوفي شر وموت اكتر من هلق الله اخدك ملاك عالجنة مشان تعيشي حياتك الجديدة مع يسوع..ريتا يا ملاك❤
وباقي العالم هدول الجرحى لي بلا ايدين وبلا رجلين هدول شو زنبون شو دخلون بالحرب وبيلي اخترع هالحرب والله ما دخلون...كريستين يلي انبترت رجلا شو زنبا؟؟ ليكون زنبا انها رايحة تتعلم؟؟ ازا هيك لنوقف المدارس ونقعود بالبيت... بس كمان في عالم انصابت كانت رايحة تجيب غراض بيتا من هونيك يعني معقول كل واحد طلع من بيتو صار مهدد بالخطر؟؟...بوكرا رح نرجع نطلع ورح نرجع نشوف ضو الشمس مارح توقفوا حياتنا فهموا بقا وحاج تقتلونا واحد ورا التاني...شو زنبا الولاد لي راجعة تعبانة من مدرستا وجوعانة مانا مصدقة توصل عالبيت لتاكول بعد نهار طويل..زنبا أنها عم تعيش حياتا؟ ولا زنبا الحرب؟ شو هالدنية الظالمة!!
وهلق شو ..بوكرا رح نرجع متل العادة نفيق الصبح ونروح عالمدرسة ونرجع نموت ونرجع كمان نفيق ونروح عالمدرسة وبعدين الحياة طبعاً بدا تستمر بس خلص حاج بقا لازم تستمر بشوية فرح..بشوية تسامح بين بعضنا خلص حاجتنا حرب والله حاجتنا...
يا ريتا يا احلى ملاك الله يرحمك❤
الله يقومك بالسلامة يا كريستين❤
ويشفي كل الجرحى ويرحم الشهداء..

ماريا كلارا منصور...

تابع القراءة »

بلدي

ليش هيك صار فيك يا بلدي؟؟؟...يمكن كتير منسأل هاد السؤال وكتير منحب نعرف جوابو...بس هو صعب يتجاوب عليه... يا ترى نحنا اخترنا الحرب ولا الحرب انفرضت علينا؟؟ الحرب أخدت كلشي مننا بدون ما ترجعلنا شي...بس بقي شي واحد معنا ومستحيل ياخدو اي حدا مننا ...شي واحد كل يوم الصبح هو يلي بيعطينا الشمس يلي بتضويلنا الدنية...حدا دايماً واقف حدنا ...بكل وقت عم يسمعنا...كلشي منعملو هو السبب الأول بنجاحنا في..."بقي معنا رجاء انو يسوع بقلبنا ومعنا دايماً" حتى الحرب ما بتقدر تاخد يسوع من قلوبنا...بعد 7 ايام جاي يسوع يخلق جواتنا...فضولو المغارة المليانة خطايا فضولو قلبكن ...لي عندو خطايا بسرعة يروح يعترف ما يستنا بوكرا... لي زعلان من حدا يروح يصالحو لانو الإنسان الموجود معنا هو صورة يسوع عالأرض...يلي نسيان كنيستو بسرعة يروح يدور عليا بكل زاوية من ذاكرتو لانو اكيد رح يلاقيا بالجزء الكبير من حياتو...رح ننساكي يا حرب رح نتذكر بس انو يسوع جاي لعنا جاي يسكن معنا رح ننسا وجعنا منك ونتذكر انو يسوع جاي يداوي جروحنا رح قلك شي يا حرب لا تنسي: ما رح تنسينا يسوع لي رح يسكن معنا.. يسوع جواتنا أقوى من صوت الانفجار وأقوى من صوت القذيفة يسوع جواتنا صوتو أعلى من هيك...من الآخر علوا صوات الخير جواتكون وخلوها تكون أعلى من صوات الشر...
ماريا كلارا منصور 
17/12/2017

تابع القراءة »

حياة ما بعد الموت

•حياة ما بعد الموت• 
مرة قلت: "بعد كل حزن ووجع في ضحك وفرح" 
وهي الجملة كانت الأمل...نحنا ما منفكر كيف نحنا عايشين رغم كل الظروف الصعبة...نحنا دايماً عم نصبر لانو الله عم يحط معجزات بطريقنا...صحيح منبكي ومنزعل و هدول شغلات ضرورية لحتى يثبت الإنسان ذاتو وانو هو عايش كائن عم يتنفس ويعيش متل مو الله رايدلو..ومن خلال تجربتي بالحياة تأكدت من هالجملة لي قلتا...هالجملة كانت عزاء إلي بأيام ضعفي...وتأكدت كمان انو الصبر هو عنجد مفتاح الفرج ورح تفرج قد ما طال الزمن...وانو هاد الشي الوحيد يلي فينا نعملو وما منندم بالعكس الصبر هو كلشي لما تسكر الدنية ب وجنا... 
▪الشخصيات:
 سما..سالي..سارة..
سرور..ساري..
بسمة..طارق
الدكتور 
•في المستشفى..:
الدكتور: رح نعمل كلشي البنت عم تقاوم.. كتير اجتنا حالات متلا مستسلمة أما سما الحمدالله قوية متل الجبل الله يحميا..
 طارق: يعني في أمل؟!
الدكتور: طبعاً.
بسمة: يارب
سالي: روقي تانت اكيد رح تقوم بالسلامة هي العملية عم تعملا لحتى تكون منيحة رح تشوف ورح تكون مبسوطة كتير انو رح ترجع تشوف الدنية بعيونا
بسمة: يارب تكون معا ومعنا...
|سما أقوى بنت بالشلة فقدت بصرا ورغم كل هاد ضلت أقوى بنت بالدنية ضلت تصارع العتمة لي عاشت فيا...شلة سما كانت شلة السين هنن سما وسالي وسارة وسرور وساري
كانو رفقات كتير قوة السما والارض ما بتفرقون...بين هالصحبة كان مخبى حب كبييير كتير بين سما وسرور طبعاً سما ما شافتو لسرور ولا مرة بس من أول ما صار معون بالشلة قلبا حب قلبو وكانت كتير تبكي انو ما بتقدر تقلو ..مابدا تخسرو من جهة ومن جهة تانية شلون بدو يحب وحدة هي ما بتشوف بس هي ما بتعرف انو سرور بموت فيا وبقوة قلبا..كان يهتم فيا كتير ..كلون كانوا يحبوا بعض كتير ..عندون الدنية بكفة وشلتون بكفة تانية ..ويوم ما كانوا مع بعض رايحين مشوار نزلت قذيفة وانصابو وفاتوا عالمشفى بس كلون كانت اصابتون بإيديون والحمدلله كلون طلعوا بخير وسلامة بس إلا هالمعترة سما ...القذيفة اخدتلا الدنية كلا من قدام عيونا وهي كانت ما تحسس حدا بهالشي بالعكس الكل كان يزعل وهي تضحك لانو عندا رفقات وما تركوها ولا لحظة وهاد الشي يلي خلا سرور يحب سما ويحب ينضم لشلتون ولصداقتون وحبهن القوي وهنن كان عندون أمل اكتر من سما انو رح ترجع تشوف وبعد 4 سنين اتفقوا مع دكتور ..ما بيجي كتير ع سورية... انو هنن يعملوا المستحيل ليجي ويعمل العملية لسما وكانت مفاجأة كبيرة لسما لما عرفت رفقاتا شو خططولا وكانت طايرة من الفرح انو رح تشوف سرور ورح ترجع تشوف رفقاتا وأهلا  والدنية كلا..ويوم العملية كانوا الكل بالمستشفى أهلا لسماطارق وبسمة ورفقاتا كلون..عم يستنوها بقلب عم يرجف لانو عمليتا كانت صعبة.. بس متأكدين انو قوتها رح تخليا احسن من قبل ..وبعد ساعتين من الانتظار الطويل..خلصت العملية وهنن هلق مع سما وعم يستنوها لتفيق:
سارة: شباب فاقت..
بسمة: بنتي حبيبة قلبي انتي منيحة؟؟
سما: اميييييي...لك انا عم شوف عم شوف وأخيراً 
|ما كانت مصدقة حالا دغري غمرتون كلون وكانت كتير مبسوطة برفقاتا وبسرور لي كانت تتمنى تشوفو :
سرور: وأخيراً شفتيني..متل ما قلتلك لو بقيان يوم صدقيني رح تشوفيني ☺
سما: اي وكتير مبسوطة😁 
|كانوا طايرين من الفرحة.. وبعد ما ارتاحت سما لفترة قرروا المشروع الجاي لي هو يروحوا كلون عالضيعة اشتاقوا لذكريات طفولتون وليبعدوا عن الحرب وأثارا فيون...وبيوم المشروع سرور كان عندو خطة ومتوتر كتير ..كانوا كتير مبسوطين:
ساري: قولولي شو بتكره بقلكون تنقعوني استنا لك يلا شو صار معكون؟؟
سارة: لك طول بالك علينا سارو..
ساري: يلا ماعد نلحق
سما: يلا يلا هي كل الغراض تفضلوا خالصين...يييي وين سرور؟؟!
سالي: حاكيتو قال عالطريق..
سارة: ليكو وصل 
سرور: مرحبا 
ساري: لك اهلين وسهلين ومرحبتين يلاا يلاا بدنا نبلش رحلتنا   الكل: يلاااااا 
|وطول الطريق يغنوا وكانوا كتير مبسوطين والدنية كلا مو وسعانتون من الفرحة ولما وصلوا ما تركوا مطرح ما زاروا واستمتعوا بكلشي وتذكروا كل ذكرياتون الحلوة وبعدين اتغدوا ولما خلصوا راحوا يتمشوا بين الشجر الأخضر يلي عاشوا طفولتون بيناتون وعشجرة لاقت سما باقة ورد كبيرة مكتوب عليا إلى سما 
طبعاً سما كانت متفاجأة كتير بس رفقاتا كانوا عرفانين..اخد سرور باقة الورد وانحنى على ركبو وصرخ بصوت عالي:
سرور: بحبك سماااااااا 
|سما كانت صدمة كبيرة بالنسبة إلها ...انو معقول الشب لي حبتو هي وعيونا مغمضة بس تفتحون يقلا بحبك..بعد الصدمة ركعت سما وصارت قدامو وقالتلو :
سما: وانا بحبك
|وبلشوا كلون يصرخوا ويضحكوا مبسوطين برفقاتون وبين الشجر كانت حفلة الفرح ..وكان يوم ما بينتسى للكل..❤
بعد كل حزن ووجع في ضحك وفرح 👌❤ 
 كتابة:ماريا كلارا منصور

تابع القراءة »

على قيد الوفاة

•على قيد الوفاة•
الشخصيات: جود_ كريستين_ أم جود_ وداد _ روني (صديق جود في المعركة) _مايكل (المسؤول عن الجنود )
المكان: منزل جود _ أرض محاصرة تحت سماء الوطن
الزمان: زمن الحرب الشنيعة 

جود:《يتكلم على الهاتف》يا أم جود لا تخافي
أم جود: يا أمي دير بالك عحالك نحنا كلنا هون ناطرينك 
جود: ولو يا أمي ابنك عند كلمتو ولما يحكي بنفذ عم قلك راجع بوعدك يا أمي..امي كريستين عندك؟؟
كريستين : انا هون عم اسمعك وناطرتك يا روح الروح
جود: كوكية قلبي ونور عيوني راجع ...مو بيوم عرسنا وعدتك ما اتركك وما رح أتركك حبيبتي نحنا بدنا نجيب جاد ولا نسيتي يا احلى ام جاد بالدنية
كريستين: وانا عم استناك ابو جاد وعم صليلك الله يكون معك ويرجعلي ياك بالسلامة
جود: الله يسلمك يا روحي.....
(روني: جوووووود بسرعة تعال هجموا علينا بسرعة جهز سلاحك ووقف بمركزك بسرعة )
 جود: امي بحبك يا تاج راسي... كريستين نطريني راجعلك بعشقك.. .....وسكر الخط
أم جود: جوود...لا تسكر الو ..ماعم يرد 
كريستين: سمعتي شو قالوا هجموا هجموا...يا ربي خايفة 
أم جود: طولي بالك يا بنتي اكيد هلق بيرجع بدق (بقلب خائف وهائج) 
《ساحة المعركة》 
روني: لك حيوو البطن لي حملك لك جوود البطل 
جود: لكن يا خيي بعجبك بلقطون واحد واحد
مايكل: بعد هالانتصار العظيم بفضل جود البطل يلا يا شباب الوطن رفعوا البطل عكتافكن رفعوا للسما وشهدوا للدنية كلا انو انتصارنا ببطلنا
《ثم يرفعونه على الأكتاف مع هتافات تسر النفس فقد كان بطل خطة كانت سبباً في انتصارهم》 
بعد بضعة ايام عندما كان الجنود يتناولون غداءهم كان جود يتكلم على الهاتف مع والدته...
أم جود: يا أمي لا تخوفنا عليك 
جود: امي رفعي راسك انا بطلك وانت يا كوكيتي انا بطلكن وراجعلكن.. 
《 فجأة من حيث لا أحد يعلم تصدر أصوات رصاص عالية جداً ثم تنقطع الشبكة...》
بعد مرور 5 سنوات 
كريستين: بعمرو الأمل ما بموت 
وداد: شو يلي مخليكي واثقة 
كريستين : وعدو الي وآخر كلمة قلي ياها...
وداد: شو قال؟؟
كريستين : انا بطلكن وراجعلكن...لما قالا حسيت هاد الوعد إلهام من الله ليطمن قلبي انو هو راجع 
وداد: بس نحنا من سنة ونص وصلنا خبر وفاتو يلي خلا امي تقعد بالفرشة وكان السبب بعقدة لسانها 
كريستين: والله متل ماني عم قلك انا حساسة لي بقلبي بعمرو ما كان غلط أو كذب 
وداد: الله يسمع منك 
كريستين: املي في بعمرو ما خاب 
وداد: انا رايحة اطمن عأمي 
كريستين: اذا بدك شي ناديلي
وداد: تسلمي حبيبتي 
《فتجلس كريستين وبيدها مسبحة المسيح..تصلي وتصلي وتص...فيدق جرس الباب.....
يرتعش قلب كريستين ويدق بدقات متسارعة جداً 》
وداد: انا رح افتح
كريستين: لااااء...ماحدا بيفتح الباب غيري 
《تتجه كريستين نحو الباب ووداد تقف في الداخل مذعورة من تصرف كريستين...ما بها؟؟》
《تفتح الباب وتقف في حالة صدمة كبيرة》
كريستين: عرفانة انك ما بتتركني لحالي أملي بعمرو ما خاب فيك جودي
جود: ولا رح يخيب انا جنبك لآخر نفس 
《فتضمه ليحملها ويدخل بها إلى المنزل وهما بحالة فرح لا توصف لا يمكن أن تصفها الكلمات...ومازالت وداد مذعورة تقف بصدمة كبيرة》
جود: يا خيتي انا وعدت ومو الرجال لي بيخلف بوعدو 
وداد: نورت بيتك يا خيي (فيعانقان بعضهما)
جود: وينها امي مو مبينة؟ 
وداد:....
كريستين: ....
جود: عم اسألكون وين امي؟؟؟شو بكون؟
وداد: أمك من وقت سمعت بخبر وفاتك وهي ما بتتحرك وما بتحكي
جود: انتي شو عم تقولي؟؟
وداد: متل ما سمعت يا خيي فوت لعندها بسرعة بسرعة
《 فيدخل جود إلى أمه فتدمع عينه...فيمسح دموعه بسرعة ويركع امام سرير أمه ..》
جود: امي انا هون ...انا وفيت بوعدي يا أمي يا تاج راسي 
فتنظر أمه إلى عينيه لبضعة دقائق ...
أم جود: انت عايش يا ولدي عايش يا ابن قلبي 
وداد: امي انت حكيتي.. الحمدالله يا رب 
كريستين: هي رجعلنا جود بالسلامة و شفيت مرت عمي الحمدالله عكلشي يا رب 
جود: يلا امي قومي معي بدك تمشي وبدنا نروح ناكل سوا لك انا ميت من جوعي 
أم جود: ما عاش الجوع يا ابني الغالي(فتتحرك أمه وتقوم من سريرها وتذهب إلى المطبخ وتقدم لهم المساعدة في تحضير الطعام)
أم جود: يلا تعالوا الأكل جاهز 
وداد: لك وين الصبي 
كريستين: عند جارتنا عم يلعب مع ابنها
أم جود: امي قومي جيبي 
وداد: يلا
جود:لك أي صبي شو في؟؟
كريستين: يا روح روحي اختك راحت تجيب جاد يا ابو جاد
جود: شوووووو....ما فهمت عيدي!!
أم جود: ييي امي شو باك هلق ماعد يدرلك 
جود: كوكيتي..انتي جبتيلي جاد..؟
كريستين: اي يا عمري
جود: كيفف؟
كريستين: بعد غيابك بشهرين بعد آخر مكالمة حكيتا معنا انا غبت عن الوعي اجا الدكتور وطلعت حامل 
جود: لك أحلى أم جاد بالمجرة 
جاد: ماما ماما..قالتلي عمتو البابا اجا من السفر؟
جود: جادو يا قلب البابا انت انا أبوك...تعال لجوات قلبي تعال
جاد: انا بحبك بابا ...
أم جود: لك يا ابني شو صار كيف رجعت 
جود: امي مارح احكي شي بس رح قلك جملة وحدة كنت دايماً قولا وكانت قدوتي لارجع لهون لحدكن ..." انا على قيد الوفاة وسأعود لأعيش"
كتابة: ماريا كلارا منصور

تابع القراءة »